د خواله رسنیو یو شمېر کاروونکو د یوه وېجاړ شوي موټر تصویر په خپرولو سره ادعا کړې چې د تېر حکومت د پارلمان غړی او د «سېلاب» خیریه بنسټ مشر په یوه ټرافیکي پېښه کې خپل ژوند له لاسه ورکړی دی.
خو زمونږ موندنې ښيي چې د ویجاړ شوي موټر دا انځور د نوموړي پورې تړاو نه لري او ښاغلی سېلاب ژوندی دی.
ادعا
د ټولنیزو رسنیو کاروونکو د روان میلادي کال د مارچ په ۸ ادعا کړې چې ګواکې د تېر حکومت د پارلمان غړی سید احمد سېلاب په یوه ټرافیکي پېښه کې وفات شوی دی.
د «تازه خبر/خبر عاجل» په نوم یوې فېسبوک پاڼې لیکلي: «حاجي سید احمد سیلاب په یو ترافیکي پيښه کي خپل ژوند له لاسه ورکړ».
ورته ادعا په فبروري میاشت کې هم شوې وه.
تاسو کولی شئ چې ورته فېسبوک پسټ په لاندې لېنک کې وګورئ:
حقیقت موندنه
مونږ د حقیقت موندنې لپاره د ښاغلي سېلاب فېسبوک پاڼې ته ولاړو. نوموړی اوس هم په ژوندۍ بڼه د خپلې فېسبوک پاڼې له لارې د وېډیو په بڼه را څرګندیږي. له دې څخه ښکاري چې سید احمد سېلاب ژوندی دی او د هغه د مرګ اوازې ناسم دي.
په لاندې فېسبوک پسټ کې ښاغلی سېلاب د مارچ په ۱۶ په لایف یا ژوندۍ بڼه را څرګند شوی، په داسې حال کې چې د فېسبوک یو شمېر پاڼو د مارچ په ۸ او د فبرورۍ په میاشت کې د نوموړي د مرګ خبر خپور کړی دی.
دلته کولی شئ چې تاسو د نوموړي وروستۍ وېډیو وګورئ چې د مارچ په ۱۶ په فېسبوک کې په ژوندۍ بڼه یا لایف راغلی وو.
مونږ پر دې سربېره د ویجاړ شوي موټر پر انځور د ګوګل برعکس پلټنه تر سره کړه.
زمونږ د پلټنو په پایله کې مالومه شوه چې د موټر دا انځور پخوانی دی چې د ښاغلي سېلاب پورې تړاو نه لري.
دا انځور د واده اړوند یوې ټرافیکي پېښې پورې اړه لري چې د ۱۴۰۰ هجري لمریز کال د وري/حمل په میاشت کې د جلال آباد-تورخم په لویه لاره باندې را منځ ته شوې وه.
په دې پېښه کې هغه مهال د ناوې او زوم په ګډون ۹ تنه مړه شوي وو.
د دې پېښې په تړاو کولی شئ چې نور جزیات د «جمهور نیوز» په لاندې راپور کې ولولئ:
پایله
له پورتنیو څېړنو څخه څرګنده شوه چې سید احمد سېلاب په دې وروستیو کې د ټرافیکي پېښې له امله خپل ژوند له لاسه نه دی ورکړی. نوموړی اوس هم په فېسبوک کې ژوندۍ یا لایف وېډیوګانې خپروي.
سرلیک: د پخوانی پارلمان غړی سید احمد سېلاب ژوندی دی؛ خو نوموړی د فېسبوک کاروونکو له خوا مړ بلل شوی
د واقعیت ارزوونکی: Fact Crescendo Teamپایله: False
