د ټولنیزو رسنیو یو شمېر کاروونکو ویلي چې ګنې په زابل ولایت کې د ترافیکي پېښې له امله ګڼ شمېر کسان مړه او ټپیان شوي دي. د فاکت کرېسیندو موندنو پر اساس، په دې وروستیو کې په زابل کې کومه ترافیکي پېښه نه ده را منځ ته شوې.
ادعا
د ټولنیزو رسنیو یو شمېر کاروونکو او پاڼو ادعا کړې چې ګنې په زابل کې د ترافیکي پېښې له امله ۱۵ کسان مړه شوي او ۴۰ نور ټپیان دي. د «ام ټي ان» په نوم یوې جعلي فېسبوک پاڼې د شنبې په ورځ د جولای په ۲۴مه لیکلې: «زابل ولایت کې دمسافرو ډک موټر د ټیلر سره ټکر کړی 15 کسان مړه 40 زخمیان دي. که دهرچا د کور غړي په دغه لار مسافر وو ژر یی پلټنه وکړي دلته ولایتي روغتون کې امکانات نشته زخمیان دلاسه ورکوو. د رب په خاطر پست شیر کړئ چې وارثان دزخمیانو راشي او مرسته وکړي».
دا فېسبوک پست له نورو سره ۷زره ۱۰۰ ځلې شریک شوی دی.
یوې بلې فېسبوک پاڼې هم ورته خبر یې خپور کړی دی.
حقیقت موندنه
مونږ په دې اړه د زابل د امنیه قوماندانۍ سره اړیکه ونیوله. د زابل ولایت د امنیه قوماندانۍ د مطبوعاتو آمر احسان الله تلاش د زابل ولایت د ترافیکي پېښو آمر له قوله وویل چې دا خبر حقیقت نه لري. هغه وویل چې په دې نېټه کې هېڅ کومه ترافیکي پېښه په زابل او یا هم د دې ولایت په لویه لاره کې نه ده را منځ ته شوې.
یوازې ۳ میاشتې وړاندې په زابل کې ترافیکي پېښه را منځ ته شوې وه. د تاند وېبپاڼې په دې اړه یو خبر د اپریل په ۲۳مه خپور کړی دی. د تاند راپور له مخې په هغه وخت کې د مارسیدیز او ټېلر موټر ټکر کړی وو چې له امله یې ۲۱ کسانو ته مرګ ژوبله اوښتې وه.
دا پېښه د کندهار – کابل پر لویه لاره د زابل ولایت مرکز کلات اړوند د جلدک سیمه کې رامنځ ته شوې وه.
په زابل کې د ترافیکي پېښې په اړه د تاند یو پخوانی راپور
له بلې خوا د فېسبوک یوه کاروونکی چې ځان د زابل د لویې لارې ډریور معرفي کوي، په کمنټ کې ویلی چې ګنې دا خبر حقیقت نه لري.
پایله
په دې وروستیو کې په زابل کې کومه ترافیکي پېښه نه ده را منځ ته شوې. هغه راپورونه ناسم دي چې ګنې په زابل کې د ترافیکي پېښې له امله ۱۵ کسان مړه شوي او ۴۰ نور ټپیان دي.
سرلیک: په دې وروستیو کې په زابل کې کومه ترافیکي پېښه نه ده شوې
د واقعیت ارزوونکی: Fact Crescendo Teamپایله: False
