په دې وروستیو کې په ټولنیزو رسنیو کې یو خبر لاس په لاس کیږي ګواکې دا چې د کریکټ ملي لوبغاړی محمد نبي عیسی خېل د بااخلاقه لوبغاړي جایزه خپله کړې ده. د ټولنیزو رسنیو کاروونکو تر منځ دا خبر ښکته پورته کیږي چې ښاغلي عیسی خېل د کریکټ نړیوالې شورا لخوا د څلورو غوره اخلاقو لوبغاړو تر منځ څلورم ځای خپل کړی دی. په دې خبر کې دا نه دی راغلی چې درې نور کوم لوبغاړي دي چې د ښو اخلاقو لوبغاړو په توګه ټاکل شوي دي.
آیا دا خبر سم دی؟ راشئ په دې پوه شو چې دا خبر تر کوم ځایه سم او کره دی.
د خبر ارزونه
فاکت کریسندو- افغانستان د کریکټ نړیوالې شورا ویبپاڼه او فېسبوک پاڼه له نظره تېر کړ، تر څو مالومه کړي چې ایا رښتیا هم ښاغلي عیسی خېل د بااخلاقه لوبغاړي جایزه خپله کړې ده او که نه. له ارزونې څخه وروسته دا څرګنده شوه چې دغه شورا هېڅ ډول خبر محمد نبي عیسی خېل ته د غوره اخلاقو لوبغاړي جایزې ورکولو په تړاو نه دی نشر کړی.
د دغې شورا د وېبپاڼې مطبوعاتي اعلامیې په برخه کې وروستی خبر د آیرلنډ پر وړاندې د افغانستان بریا په اړه دی چې د روان زیږدیز کال د جنورۍ پر ۲۷مه نېټه یې خپور کړی دی.
مونږ سربېره پر دې د ښاغلي عیسې خېل تویتر او فېسبوک پاڼه ولیدل چې ایا هغه دا ډول جایزه د کریکټ د نړیوالې شورا څخه تر لاسه کړی دی او که نه. د ښاغلي عیسی خېل وروستی تویت کراچۍ ته د هغه سفر په اړه دی تر څو هلته د پاکستان سوپر لیګ یا PSL سره یو ځای لوبه وکړي. هغه په یوه الوتکه کې لیدل کیږي چې په انګلیسیي ژبه یې لیکلي: «See you soon» یا د ژر لیدلو په هیله. د ده په تویت یا فیسبوک پوسټ کې هېڅ ډول خبر د بااخلاقه لوبغاړي جایزې اخستلو په تړاو نه لیدل کیږي.
See you soon @thePSLt20 @KarachiKingsARY pic.twitter.com/D0wb745MZO
— Mohammad Nabi (@MohammadNabi007) February 15, 2021
د افغانستان کریکټ بورډ هم په دې اړه څه نه دي ویلي چې ګواکې ښاغلي عیسی خېل دې د بااخلاقه لوبغاړي جایزه خپله کړې وي. د کریکټ بورډ ورستی تویت چې د روان زیږدیز کال د فبرورۍ پر ۷مه یې کړی دی د نورمحمد تره کی د لوبغالي جوړېدلو قرارداد په اړه دی.
The official contract for the second phase construction of Najeeb Tarakai Cricket Stadium in Nangarhar was signed between Afghanistan Cricket Board and Noor Matoon Construction Company.
— Afghanistan Cricket Board (@ACBofficials) February 7, 2021
More: https://t.co/3CGJF2E6wG pic.twitter.com/sc48yoNPLP
ټولنیزې رسنۍ
د روان کال د فبرورۍ پر ۱۶مه نېټه د فېسبوک کاروونکي دا خبر په بېلا بېل ډول پوسټ کړل چې ګواکي محمد نبي عیسی خېل د کریکټ نړیوالې شورا لخوا د بااخلاقه لوبغاړي جایزه خپله کړې ده. فریدالله محمدي د طلوع نیوز خبریال او د فېسبوک کاروونکی په خپله فېسبوک پاڼه کې دا خبر د فبرورۍ پر ۱۶مه پوسټ کړ. ده ویلي دي چې ښاغلی عیسی خېل د کریکټ د بااخلاقه لوبغاړي جایزې په تر لاسه کولو کې څلورم ځای خپل کړی ده. ښاغلی محمدي د دې خبر په تړاو د کومې سرچینې نوم نه دی اخستی.
د فېسبوک ځیني نور کاروونکي بیا ویلي چې ښاغلی عیسی خېل د کریکټ د څلورو بااخلاقه لوبغاړو تر منځ لومړی ځای خپل کړی دی.
جعفر هاند، د آمریکا غږ خبریال بیا په خپله فېسبوک پاڼه کې لیکلي دي چې دا خبر چا او چېرته خپور کړی دی چې د کريکټ نړیوالې شورا محمد نبي ته د نړۍ څلورم خوش اخلاقه او خاموشه لوبغاړي جایزه ورکړې ده. د ده په خبره چې دی د کریکټ نړیوالې شورا او ځیني نور ورزشي وبسایټونه لیدلي خو داسې کوم خبر یې نه دی لیدلی. ښاغلي هاند ویلي چې دی د محمد نبي تویتر یې هم چک کړ خو داسې کوم خبر یې ونه مونده.
ده د فېسبوک پر هغو کاروونکو چې دا خبر یې په ټولنیزو رسنیو کې خپور کړی دی، غږ کړی تر څو د خبر لینک او سرچېنه هم نشر کړي.
پایله
په ټولنیزو رسنیو کې د ځینو کاروونکو لخوا دا خبر خپور شوی چې د کریکټ ملي لوبغاړی محمد نبي عیسی خېل د غوره بااخلاقه لوبغاړي جایزه د کریکټ نړیوالې شورا لخوا اخستې ده. زمونږ د ارزونې او څېړنې څخه وروسته دا مالومه شو چې نوموړی خبر حقیقت نه لري.
ښاغلی عیسی خېل په دې وروستیو کې هېڅ کومه جایزه د بااخلاقه لوبغاړي په توګه نه ده اخستې. د یادولو وړ دی چې په دې وروستیو کې مهندر سنګ ډونی د هندوستان له هېواد څخه د لسیزې غوره اخلاقو جایزه یې د کریکټ نړیوالې شورا څخه اخستې.
