د خواله رسنیو یو شمېر کاروونکو او پاڼو په لبنان کې د یوې چاودنې پخوانۍ وېډیو خپره کړې چې ادعا کوي ګواکې اوکراین د روسیې بریدونو له امله ویجاړ شوی دی. د روسیې او اوکراین د روانې جګړې په لړ کې یو شمېر پخواني عکسونه او وېډیو ګانې له ناسمو ادعا ګانو سره خپاره شوي دي.
ادعا
په دې وروستیو کې د ټولنیزو رسنیو یو شمېر پاڼو او کاروونکو د روان میلادي کال د مارچ په ۲ د لبنان د چاودنې یوه پخوانۍ وېډیو خپره کړې ده. په یوه فېسبوک پاڼه کې د دې وېډیو په سرلیک کې راغلي: «یوکراین هم په کنډوالو بدل شو».
دا وېډیو په فېسبوک کې د ۷۸ زره کسانو له خوا لیدل شوې ده.
حقیقت موندنه
مونږ د حقیقت موندنې لپاره پر نوموړې وېډیو پلټنه تر سره کړه. زمونږ د پلټنو په پایله کې مالومه شوه چې دا وېډیو په لبنان کې د یوې چاودنې پورې اړه لري چې په ۲۰۲۰ میلادي کال کې په پلازمینه بېروت کې را منځ ته شوې وه.
د دې وېډیو یوه برخه په ۲۰۲۰ میلادي کال کې د اګست په ۴ د یوې تویتر کاروونکې ‘Rola’ له خوا خپره شوې ده. د وېډیو په سرلیک کې په انګلیسی ژبه د «بېروت چاودنه» هشتګ کارول شوی دی.
دا وېډیو کولی شئ چې لاندې وګورئ:
مونږ همدا راز د فېسبوک پسټ د وېډیو اړوند یو شمېر انځورونه هم وموندل چې د بېروت چاودنې په توګه خپاره شوي دي.
پایله
له پورتنیو څېړنو څخه څرګندیږي چې د فېسبوک پسټ ادعا د اوکراین په اړه ناسم دی. دا وېډیو د لبنان د چاودنې پورې تړاو لري چې تر چاودنې وروسته د ویجاړۍ کچه ښيي.
دا وېډیو د اوکراین او روسیې تر منځ د روانې جګړې پورې اړه نه لري.
