ایا دا انځور د کابل هوایي ډګر پورې اړه لري؟

د ټولنیزو رسنیو یو شمېر کاروونکو د مکسیکو ښار د هوایي ډګر انځور د کابل د هوایي ډګر په توګه خپور کړی دی.

ادعا

د ټولنیزو رسنیو یو شمېر کاروونکو د ۲۰۲۱ زیږدیز کال د جولای په ۱۱مه د مکسیکو ښار هوایي ډګر انځور خپور کړی. دوی ویلي چې ګنې دا انځور د کابل هوایي ډګر پورې اړه لري.

د «افغانیه» په نوم یوې فېسبوک پاڼې دا انځور یې خپور کړی دی. 

دا انځور له نورو سره ۴۰ ځله شریک شوی دی.

فېسبوک/ آرشیف لېنک

حقیقت موندنه

فاکت کرېسیندو په دې انځور باندې د ګوګل او بینګ پلټنه تر سره کړه. په پایله کې مو وموندله چې دا انځور د کابل هوایي ډګر پورې اړه نه لري. دا انځور د مکسیکو ښار نړیوال هوایي ډګر پورې اړه لري. دا انځور په ۲۰۰۶ زیږدیز کال د مارچ په میاشت کې د یوه مکسیکویی عکاس «جوان کارلوس» په واسطه اخستل شوی دی.

دا انځور د ‘www.airliners.net’ وېبپاڼې له خوا په ۲۰۰۶ کال کې د اپریل په ۱۶مه نېټه خپور شوی دی.

وېبپاڼه/ آرشیف لېنک

د مکسیکو ښار هوایي ډګر په اړه

د مکسیکو ښار هوایي ډګر د «بنیتو جوارز» په نوم هم یادیږي چې په مکسیکو ښار کې موقعیت لري. په دې هوایي ډګر کې ۳۰ ملي او نړیوال هوایي شرکتونه فعالیت کوي. دا هوایي ډګر د مکسیکو او لاتینې امریکې یو له تر ټولو بوخت هوایي ډګرونو څخه ګنل کیږي. د مکسیکو ښار نړیوال هوایي ډګر د نړۍ په کچه د بوختو هوایي ډګرونو په لړ کې ۳۳ام ځای لري. 

پایله

د هوایي ډګر هغه انځور چې د ټولنیزو رسنیو ځینو کاروونکو له خوا لاس په لاس شوی دی، د کابل هوایي ډګر پورې اړه نه لري. دا انځور د مکسیکو ښار هوایي ډګر را ښيي.