د ټولنیزو رسنیو یو شمېر کاروونکو د پخواني افغان ولسمشر محمد اشرف غني انځور خپور کړی او ادعا یې کړې چې ګواکې نوموړی کابل ته تللی دی.
ادعا
د خواله رسنیو یو شمېر کاروونکو د روان میلادي کال د مارچ په ۲۲ ادعا کړې چې ګواکې پخوانی ولسمشر محمد اشرف غني کابل ته رسېدلی دی.
د «تازه خبر/خبر عاجل» په نوم یوې فېسبوک پاڼې لیکلې: «ولسمشر غنی د افغان نوی حکومت په غوښتنه کابل ته راورسید،
غنی د خلکو د کلک استقبال سره مخ شو».
حقیقت موندنه
مونږ د حقیقت موندنې لپاره پر نوموړي انځور د ګوګل برعکس پلټنه تر سره کړه. په پایله کې مو وموندله چې دا انځور پخوانی دی. دا عکس د ښاغلي غني هغه سفر پورې تړاو لري چې په ۲۰۲۱ کال کې د جون په میاشت کې یې امریکا ته کړی وو. په دې سفر کې د تېر حکومت د سولې عالي شورا مشر ډاکټر عبدالله عبدالله او امرالله صالح هم ګډون کړی وو.
دا انځور له لاندې وېډیو څخه اخستل شوی دی. وېډیو د ارګ په تویتر پاڼه کې په ۲۰۲۱ کال کې د جون په میاشت کې خپره شوې ده. د تویت په سرلیک کې لیکل شوي: «جمهوررئیس محمد اشرف غني د امریکا متحدو ایالتونو پلازمېنه واشنګټن ته ورسېد».
له بلې خوا په تصویر کې ډاکټر عبدالله عبدالله هم لیدل کیږي چې ښيي د فېسبوک پسټ ادعا ناسمه ده. په داسې حال کې چې ښاغلی عبدالله د هېواد له سقوط راهیسې په افغانستان کې دی او د طالبانو له خوا بهر ته د سفر بندیز ورباندې لګول شوی دی.
پایله
له پورتنیو پلټنو څخه څرګنده شوه چې د اشرف غني دا انځور پخوانی دی. ښاغلی غني په دې وروستیو کې کابل ته نه دی تللی.
دا انځور امریکا ته د نوموړي سفر پورې تړاو لري چې په ۲۰۲۱ کال کې د جون په میاشت کې هلته تللی وو.
سرلیک: په دې وروستیو کې اشرف غني کابل ته نه دی تللی
د واقعیت ارزوونکی: Fact Crescendo Teamپایله: False
