افغان کرېکټ ستوری راشد خان نه دی مړ شوی
په ټولنیزو رسنیو کې ځیني وخت ناسم خبرونه نشر کیږي چې باور ورباندې ګران دی.
په دې وروستیو کې د افغان کرېکټ مشهور توپ اچوونکی راشد خان د مړینې ادعا په ټولنیزو رسنیو کې خپره شوې ده.
په ادعا کې راغلي چې ګواکې ښاغلی راشد خان په عربي متحده اماراتو کې د یوې ترافیکي پېښې له امله مړ شوی دی.
فېسبوک پست ادعا کوي:
« تکړه افغان توپ اچوونکی په اماراتو کې په یوه ترافیکي پېښه کې مړ شوی دی.»
تاسو کولای شئ دا فېسبوک پسټ لاندې وګورئ:
حقیقت موندنه
مونږ د دې ادعا په تړاو په نوموړی انځور پلټنه تر سره کړه. مګر د دې ادعا په تړاو مو هېڅ کوم خبر ونه مونده. له بلې خوا مونږ د ښاغلي راشد خان اړوند د ټولنیزو رسنیو پاڼې هم ولیدلې او ومو موندله چې هغه په ټولنیزو رسنیو کې فعالیت لري.
د راشد خان انسټاګرام پاڼه:
که داسې څه پیښه شوې وای نو د رسنیو له لارې به په دې اړه خورا ډېر خبرونه خپریدل. خو مونږ د دې پېښې په اړه یو خبر هم ونه مونده.
له بلې خوا د افغانستان کرېکټ بورډ په وېبپاڼو او ټولنیزو رسنیو پاڼو کې داسې کوم خبر نه دی خپور شوی.
پایله
له پورته څېړنو څخه څرګنده شوه چې د راشد خان د مړینې ادعاوې په بشپړ ډول دروغ او ناسم دي. تر اوسه داسې کومه پېښه نه ده را منځ ته شوې.
